سکیورٹی فورسز نے جنوبی وزیرستان میں ایک چیک پوسٹ پر بھارتی حمایت یافتہ فتنہ الخوارج کے دہشت گردوں کا بزدلانہ حملہ ناکام بناتے ہوئے خودکش حملہ آور سمیت چار خوارج کو ہلاک کر دیا۔

پاک فوج کے شعبۂ تعلقاتِ عامہ (آئی ایس پی آر) کے مطابق دہشت گرد بارودی مواد سے بھری گاڑی کے ذریعے چیک پوسٹ کو نشانہ بنانا چاہتے تھے، تاہم سکیورٹی فورسز نے بروقت کارروائی کرتے ہوئے گاڑی کو چیک پوسٹ کی حدود سے باہر ہی تباہ کر دیا۔

آئی ایس پی آر کے مطابق ابتدائی کارروائی کے بعد کیے گئے کلیئرنس آپریشن میں قریبی عمارت میں چھپے مزید تین دہشت گردوں کو بھی ہلاک کر دیا گیا۔

علاقے میں موجود ممکنہ دہشت گردوں کی تلاش کے لیے سرچ اور سینیٹائزیشن آپریشن جاری ہے۔ بیان میں مزید کہا گیا ہے کہ سکیورٹی فورسز اور قانون نافذ کرنے والے اداروں کی انسدادِ دہشت گردی مہم دہشت گردوں کے مکمل خاتمے تک بلا تعطل جاری رہے گی۔