صدر آصف علی زرداری اور وزیراعظم محمد شہباز شریف نے خیبر پختونخوا میں دس خوارج کو ہلاک کرنے پر سیکیورٹی فورسز کو خراج تحسین پیش کیا ہے۔

اپنے الگ الگ پیغامات میں انہوں نے شمالی وزیرستان اور ہنگو میں فتنہ خوارج کے خلاف کامیاب کارروائیوں پرسیکیورٹی فورسز کو سراہا۔

انہوں نے دہشت گردوں کے خلاف لڑتے ہوئے جام شہادت نوش کرنے والے بہادر سیکیورٹی اہلکاروں کو بھی خراج عقیدت پیش کیا اور ان کے اہل خانہ سے دلی تعزیت کی۔

صدر نے کہا کہ دہشت گردی کے خلاف جنگ میں سیکیورٹی فورسز کی قربانیاں ناقابل فراموش ہیں جن سے قوم کے عزم اور حوصلے کو تقویت ملتی ہے۔

وزیراعظم نے کہا کہ آپریشن عزمِ استحکام کے تحت دہشت گردی کے خلاف کارروائیاں بھرپور قوت کے ساتھ جاری رہیں گی۔