آئی ٹی اور ٹیلی مواصلات کی وزیر مملکت شزا فاطمہ نے آئی ٹی برآمدات بڑھانے کیلئے ٹیلی مواصلات کے فعال اور تیزرفتار بنیادی ڈھانچے کی ضرورت پر زور دیا ہے۔
انہوں نے پیر کے روز اسلام آباد میں ایک تقریب سے خطاب کرتے ہوئے کہا کہ پاکستان ٹیلی کمیونیکیشن اتھارٹی نے پاکستان کے آئی ٹی کے موجودہ بنیادی ڈھانچے کا جامع سروے کروانے اور فائیو جی کے لئے ملک کی تیاریوں کا جائزہ لینے کیلئے بین الاقوامی کنسلٹنٹس سے رابطہ کیا ہے۔
انہوں نے کہا کہ حکومت نیشنل Fiberization پالیسی پر کام کر رہی ہے جس کے ذریعے ٹیلی مواصلات کے بنیادی ڈھانچے میں نجی شعبے کی سرمایہ کاری کی حوصلہ افزائی کی جائے گی۔وزیر مملکت نے یقین ظاہر کیا کہ حکومتی اقدامات سے ملکی اور بین الاقوامی سرمایہ کار راغب ہونگے جس سے پاکستان کے ٹیلی مواصلات کے بنیادی ڈھانچے کو بہتربنانے اور ملک کو ڈیجیٹل خطوط پر استوار کرنے میں مدد ملے گی۔
