ڈیجیٹل پلیٹ فارمز پر منفی پراپیگنڈا کرنے والوں کے گرد گھیرا تنگ کر دیا گیا ہے اور پی ٹی آئی کی سوشل میڈیا ٹیم کے دس ارکان کو کل مشترکہ تحقیقاتی ٹیم کے سامنے پیش ہونے کیلئے طلب کیا گیا ہے۔

ذرائع کے مطابق وفاقی حکومت کی جانب سے قائم کردہ جے آئی ٹی نے سوشل میڈیا پر منفی پروپیگنڈہ پھیلانے والے ملزمان کو طلب کرلیا ہے۔

نوٹسز میں واضح طور پر ان افراد کو اس معاملے پر اپنی پوزیشن واضح کرنے کی ہدایت کی گئی ہے۔ ذرائع کا کہنا ہے کہ جے آئی ٹی کے پاس اس معاملے میں ان افراد کے ملوث ہونے کے ٹھوس شواہد موجود ہیں۔

واضح رہے کہ جے آئی ٹی کی تشکیل الیکٹرانک کرائمز ایکٹ 2016 کے سیکشن 30 کے تحت کی گئی تھی۔

جے آئی ٹی انسپکٹر جنرل پولیس اسلام آباد کی سربراہی میں تحقیقات کر رہی ہے۔ مشترکہ تحقیقاتی ٹیم سوشل میڈیا پر پاکستان مخالف بیان بازی اور بے بنیاد الزامات لگانے والے افراد کی تحقیقات کر رہی ہے۔