نائب وزیراعظم اور وزیر خارجہ سینیٹر محمد اسحاق ڈار نے وزیراعظم کی خصوصی فیول ریلیف اسکیم سے استفادہ کرنے والوں کو سہولت فراہم کرنے اور ملک میں خدمات کی بلاتعطل فراہمی یقینی بنانے کیلئے رابطہ کاری کو موثر بنانے کی ضرورت پر زور دیا ہے۔
انہوں نے یہ بات وزیراعظم کی خصوصی فیول ریلیف اسکیم پر عملدرآمد کے حوالے سے آج اسلام آباد میں فیول سبسڈی کے بارے میں قومی رہبر کمیٹی کے اجلاس کی صدارت کرتے ہوئے کہی۔
کمیٹی نے رجسٹریشن، ٹوکن حاصل کرنے، ادائیگیوں اور شکایات کے ازالے کے نظام پر پیشرفت کا جائزہ لیا۔
کمیٹی کو بتایا گیا کہ اب تک چھہتر لاکھ رجسٹریشنز کی گئی ہیں اور ٹوکن کے حصول کا عمل دوسرے ہفتے میں داخل ہو گیا ہے۔
کمیٹی کو یہ بھی بتایا گیا کہ آج تک ستتر لاکھ دس ہزار ٹوکن حاصل کئے گئے ہیں۔
نائب وزیراعظم نے سکیم کی کامیابی کو سراہتے ہوئے کہا کہ یہ حکومت کی مجموعی حکمت عملی کی عکاس ہے۔
اسحاق ڈار نے کہا کہ انفارمیشن ٹیکنالوجی اور ٹیلی کام کی وزارت، وزارت اطلاعات و نشریات، وزارت پیٹرولیم، اوگرا، سٹیٹ بینک آف پاکستان اور تمام صوبوں نے حکومت کی مجموعی حکمت عملی میں ٹھوس کوششیں کی ہیں۔
