وزیر اعظم شہباز شریف نے کہا ہے کہ حکومت ایمپلائز اولڈ ایج بینیفٹ اور ورکرز ویلفیئر فنڈ کا دائرہ کار بڑھا رہی ہے تاکہ زیادہ سے زیادہ ملازمین، کارکنان اور افرادی قوت ان سے مستفید ہوسکیں۔

اسلام آباد میں انٹرنیشنل ٹریڈ یونین کنفیڈریشن کے سیکرٹری جنرل Luc Triangle سے گفتگو کرتے ہوئے انہوں نے کہا کہ وفاقی سطح پرقومی فنی و تکنیکی تربیتی کمیشن اور صوبائی سطح پر مختلف فنی تربیتی ادارے نوجوانوں کو منڈی کی ضروریات کے مطابق ہنرمند بنانے کیلئے کئی تربیتی پروگرام منعقد کر رہے ہیں۔

ٰوزیر اعظم نے کہا کہ پاکستان موسمیاتی تبدیلی سے سب سے زیادہ متاثر ہونے والے ممالک میں شامل ہے۔ 2022 کے سیلاب کے باعث پاکستان کو تیس ارب ڈالر کے نقصانات اٹھانے پڑے۔

انہوں نے کہا کہ موسمیاتی تبدیلیوں کی وجہ سے پاکستان میں مزدوروں اور کارکنوں کو روزگار کے حوالے سے کئی مسائل اور نقصانات کا سامنا کرنا پڑا ہے۔

شہباز شریف نے کہاکہ موسمیاتی تبدیلی سے لاحق ہونے والے مسائل کے حل کیلئے پاکستان اور اس جیسے دیگر ممالک کو بین الاقومی مالیاتی اداروں کی خصوصی مالی معاونت درکار ہوگی۔

وزیر اعظم نے کہا کہ حکومت اس امر کو یقینی بنا رہی ہے کہ ماحولیاتی تبدیلی کے خطرے سے دوچار کمیونٹیز میں ماحولیاتی تبدیلی سے موافقت اور اسکے مضر اثرات کی تخفیف کی کوششیں معاشی طور پر کمزور طبقے کے معاش کا تحفظ کریں۔

اس موقع پر انٹرنیشنل ٹریڈ یونین کنفیڈریشن کے سیکرٹری جنرل نے پاکستان میں جمہوری اقدار کی تعریف کرتے ہوئے، ملک میں مزدوروں اور کارکنوں کی بہتری کیلئے کئے جانے والے اقدامات کو سراہا۔