وزیر بحری امور جنید انور چوہدری نے پاکستان کے بحری شعبے کو ماحولیاتی محفوظ اور پائیدار بنانے میں سمندری نباتات کے ماحولیاتی نظام کی اہمیت پر زور دیا ہے۔

آج (اتوار) ایک بیان میں انہوں نے ماحولیاتی تحفظ کے لیے اہم سمندری مسکن جیسے کہ مینگرووز، اور نمکیاتی دلدلوں کے تحفظ اور بحالی پر زور دیا۔

جنید انور چوہدری نے وضاحت کی کہ "بلو کاربن" ایکو سسٹمز نہ صرف طاقتور کاربن ذخائر کے طور پر کام کرتے ہیں بلکہ بڑھتے ہوئی سمندری سطح، ساحلی کٹاؤ اور شدید موسمی حالات کے خلاف قدرتی دفاع بھی فراہم کرتے ہیں۔

انہوں نے کہا کہ دریائے سندھ کا ڈیلٹا، جو دنیا کے سب سے بڑے مینگرووز جنگلات کا حامل ہے، ساحلی علاقوں کو مضبوط کرنے، ماہی گیری میں مدد دینے اور طوفانوں کے خلاف حد فاصل کے طور پر کام کرنے کے لیے انتہائی اہم ہے۔