بلوچستان حکومت کے ترجمان شاہد رند نے کہاہے کہ ملک دشمن عناصرصوبے کی ترقی کے عمل کو نقصان پہنچانا چاہتے ہیں تاہم وہ اپنے مذموم ارادوں میں ہرگزکامیاب نہیں ہوں گے۔انہوں نے آج (بدھ) کوئٹہ میں محکمہ انسداد دہشت گردی کے ڈی آئی جی اعتزاز گورایا اور ڈپٹی کمشنر کوئٹہ سعد بن اسد کے ہمراہ ایک نیوز کانفرنس سے خطاب کرتے ہوئے کہاکہ حکومت تمام متعلقہ فریقوں سے بات چیت کے لئے تیار ہے جبکہ مستونگ دھرنے کے حوالے سے سرداراخترمینگل کے ساتھ مذاکرات کا عمل جاری ہے۔انہوں نے ایک سوال کے جواب میں کہاکہ بعض سیکورٹی خطرات کے پیش نظرکوئٹہ میں انٹرنیٹ اور موبائل سروس معطل کر دی گئی ہے۔محکمہ انسداد دہشت گردی کے ڈی آئی جی نے کہاکہ کوئٹہ میں بلوچ یکجہتی کمیٹی احتجاج کے دوران مظاہرین نے پولیس کی کئی گاڑیوں، ایک ڈاک خانے اور سیف سٹی منصوبے کے تحت نصب شدہ کئی سی سی ٹی وی کیمروں کو نذر آتش کردیا۔انہوں نے کہاکہ بلوچ یکجہتی کمیٹی کوئی رجسٹرڈ تنظیم نہیں ہے ۔انہوں نے کہاکہ بلوچستان یکجہتی کمیٹی سوشل میڈیا پلٹ فارمز پر ملک اور اداروں کے خلاف پراپیگنڈہ کررہی ہے۔