وزیر خزانہ محمد اورنگزیب نے ادارہ جاتی اصلاحات، ٹیکس دائرہ کار کو وسعت دینے، نجی شعبے کو آگے لانے اور غیر ملکی سرمایہ کاری راغب کرنے کے ذریعے قومی معیشت کو مضبوط اور مستحکم بنانے کیلئے حکومت کے عزم کا اعادہ کیا ہے۔

کراچی میں پاکستان اسٹاک ایکسچینج میں ایک تقریب سے خطاب کرتے ہوئے انہوں نے کہا کہ حکومت ترقی کے ذریعے معیشت کو آگے بڑھانے کیلئے نجی شعبے کو سہولت فراہم کرنے کیلئے ہر ممکن اقدامات کر رہی ہے۔

محمد اورنگزیب نے کہا کہ حکومت کی دانشمندانہ پالیسیوں کے باعث قومی معیشت درست سمت پر گامزن ہے، جس کے نتیجے میں ٹیکس دہندگان کی تعداد میں اضافہ ہوا ہے۔

انہوں نے کہا کہ ٹیکس گوشوارے جمع کرانے والوں کی تعداد ستاون لاکھ سے تجاوز کرگئی ہے جو گزشتہ سال تقریباً اُنتالیس لاکھ تھی۔

انہوں نے کہا کہ حکومت سرمایہ کاری راغب کرنے اور اپنا گھر اسکیم جیسے اقدامات کے تحت مالی معاونت کے مواقع بڑھانے کیلئے بھی اقدامات کر رہی ہے، جس کے تحت تقریباً ساٹھ ارب روپے تقسیم کیے جا چکے ہیں۔