وزیراعظم شہبازشریف نے انسانی سمگلنگ کے مکروہ دھندے میں ملوث تمام افراد کو ایک ہفتے میں گرفتارکرکے ان کے خلاف قانونی کارروائی کرنے کی ہدایت کی ہے۔
اسلام آباد میں انسانی سمگلنگ کے خاتمے کیلئے جائز ہ اجلاس کی صدارت کرتے ہوئے انہوں نے ہدایت کی کہ انسانی سمگلروں کے خلاف قانونی کارروائی کو زیادہ موثر بنایا جائے۔
وزیراعظم نے استفسار کیا کہ انسانی سمگلنگ کے سہولت کار سرکاری اہلکاروں کے خلاف اب تک کیوں کارروائی نہیں کی گئی۔
انہوں نے کہا کہ بیرون ملک جانے والے تمام افراد کے ویزوں کی جانچ پڑتال اور دوسرے قواعد کو بھی زیادہ موثر بنایا جائے۔
انہوں نے کہا کہ حکومت ملک سے انسانی سمگلنگ کے مکمل خاتمے کیلئے پرعزم ہے۔
شہبازشریف نے انسانی سمگلنگ کی روک تھام کا مستقل حل تلاش کرنے کیلئے وزیر داخلہ کی سربراہی میں ایک کمیٹی بھی تشکیل دینے کی ہدایت کی۔
وزیراعظم کو ملک میں انسانی سمگلنگ کے خلاف کئے گئے اقدامات کے بارے میں تفصیل سے آگاہ کیا گیا۔
