وزیراعظم شہبازشریف نے بلوائیوں سے نمٹنے کیلئے اسلام آباد اورپورے ملک میں انسداد بلوہ فورس قائم کرنے کی ہدایت کی ہے۔

انہوں نے آج (جمعرات) اسلام آباد میں امن وامان کی صورتحال کے جائزہ اجلاس کی صدارت کرتے ہوئے کہا کہ یہ فورس پیشہ وارانہ تربیت کے حامل اہلکاروں اور بین الاقوامی سطح کے ضروری آلات اور ہتھیاروں سے لیس ہونی چاہیے۔

اجلاس میں وزیراعظم کو مظاہروں کے دوران مظاہرین کی جانب سے سرکاری املاک ، پولیس اوررینجرز پرحالیہ حملوں کے بارے میں بتایا گیا۔

انہوں نے کہا کہ اسلام آباد پر دھاوا بولنے والے شرپسندوں کے خلاف فوری قانونی کارروائی کی جانی چاہیے۔

وزیراعظم نے استغاثہ کے نظام کو بہتر بنانے کی ہدایت کی۔

شہبازشریف نے کہا کہ انتشار پسندوں کا یہ گروہ اور ان کے سرغنہ قومی معیشت کو پہنچنے والے نقصان کے ذمہ دار ہیں۔

انہوں نے کہا کہ شرپسندوں کی فوری شناخت کرکے انہیں عبرتناک سزائیں دی جائیں۔