وزیر اطلاعات عطاء اللہ تارڑ نے کہا کہ حکومت دور حاضر کے رجحانات سے ہم آہنگ جدید اور فعال ذرائع ابلاغ یقینی بنانے پر مکمل توجہ مرکوز کررہی ہے۔
انہوں نے کہا کہ سوشل میڈیا اور مصنوعی ذہانت کے استعمال میں انصاف سے کام لینے کی ضرورت ہے اور اس میں کسی طرح کی جانبداری کا مظاہرہ نہیں کیا جانا چاہئے۔
وہ ریاض میں سعودی میڈیا گروپ کے زیر اہتمام ایک مکالمے میں اظہارخیال کررہے تھے۔
وزیر اطلاعات نے سماجی مسائل کا سبب بننے والی جھوٹی خبروں اور غلط معلومات پھیلانے کے مسئلے سے نمٹنے کی ضرورت پر زور دیا ہے۔
انہوں نے کہا کہ عالمی سطح پر ایک ایسا ادارہ ہونا چاہئے جو مصنوعی ذہانت کے ذریعے حقائق کا پتہ لگا سکے۔
وزیر اطلاعات نے کہا کہ ذرائع ابلاغ کی بین الاقوامی تنظیموں کے ساتھ شراکت داری مفید ہوسکتی ہے اور وقت کا تقاضا ہے کہ اب نئے معاہدے کے تحت اشتراک عمل کو مضبوط بنایا جائے۔
انہوں نے کہا کہ پاکستان میں خبروں اور تفریح کے بہترین چینلز ہیں اور ہم فلمیں اور دستاویزی فلمیں بنانے کی صلاحیت بھی رکھتے ہیں۔
عطاء اللہ تارڑ نے کہا کہ بین الاقوامی اداروں کا پاکستانی میڈیا سے اشتراک عمل خوش آئند ہے۔
