نیشنل ڈیزاسٹر مینجمنٹ اتھارٹی نے آئندہ دو روز کے دوران شدید بارش کی پیشگوئی کے بعد ملک کے مختلف علاقوں میں ممکنہ سیلاب کا الرٹ جاری کیا ہے۔
نیشنل ایمرجنسیز آپریشن سینٹر کے مطابق بالائی علاقوں میں متوقع بارشوں کے باعث دریائوں اور ندی نالوں کے بہائو میں اضافے کا خدشہ ہے۔
گلگت بلتستان کے بڑے اضلاع گلگت، دیامر، غذر، ہنزہ، اورسکردو میں اچانک سیلابی صورتحال پیدا ہو سکتی ہے۔
خیبر پختونخوا میں اپر دیر، سوات، باجوڑ، مالاکنڈ، کرم، کوہستان، مہمند اور اورکزئی کے علاقوں میں بھی سیلاب کا خطرہ ہے۔
پنجاب میں راولپنڈی، گوجرانوالہ، سرگودھا، جھنگ، ٹوبہ ٹیک سنگھ اور شیخوپورہ کے شہری علاقوں میں سیلا بی صورتحال متوقع ہے۔
بلوچستان میں ژوب، شیرانی اور موسی خیل کے علاقوں میں سیلابی صورتحال کا خدشہ ہے۔
شہریوں کو ہدایت کی گئی ہے کہ وہ شدید بارش کے دوران برساتی نالوں، زیر آب سڑکوں، پلوں اور نشیبی گزرگاہوں کو عبور کرنے سے گریز کریں۔
