قطر نے قومی ترقی کے پاکستانی منصوبے وژن دوہزار تیس کے تحت پاکستان میں سرمایہ کاری کے نئے مواقع کی تلاش میں گہری دلچسپی ظاہر کی ہے۔پاکستان میں قطر کے سفیر شیخ سعود عبدالرحمان الثانی نے وزیراعظم کے معاون خصوصی جواد سہراب ملک کے ساتھ اسلام آباد میں ملاقات کے دوران اسی دلچسپی کا اظہار کیا۔انہوں نے کہا کہ قطر تعلیم، غذائی تحفظ، ایل این جی پلانٹس کے قیام اور ہوائی اڈوں پر بنیادی ڈھانچے کی ترقی کے شعبوں میں پاکستان کو اپنا اہم شراکت دار سمجھتا ہے۔قطر کے سفیر سے گفتگو کرتے ہوئے جواد سہراب ملک نے پاکستان میں خصوصاً قابل تجدید توانائی، تعلیم، بندرگاہوں پر ایل این جی ٹرمینلز کے قیام، پن بجلی منصوبوں اور ہوائی اڈوں کے بنیادی ڈھانچے کی ترقی کے شعبوں میں سرمایہ کاری کے وسیع امکانات کو اجاگر کیا۔