مواصلات کے وزیر عبدالعلیم خان نے کہا ہے کہ گلگت سے خنجراب موٹروے سے چین اور وسط ایشیائی ممالک کے ساتھ روابط یقینی بنانے میں مدد ملے گی۔
انہوں نے آج(جمعرات) کو اسلام آباد میں نیشنل ہائی وے اتھارٹی کے مختلف منصوبوں کے حوالے سے ایک اجلاس کی صدارت کرتے ہوئے کہا کہ سڑکوں اور ریل کے ذریعے گوادرتک روابط کا قیام انتہائی اہم ہے۔
وفاقی وزیر نے گلگت سے چترال، شندور، مانسہرہ اور دوسرے شہروں تک معیاری شاہراہوں کا قیام یقینی بنانے کی ہدایت کی۔
عبدالعلیم خان نے کہا کہ اگر شاہراہیں زیادہ محفوظ ہوںگی تو سیاحوں اور دوسرے شہریوں کو سفر کی بہتر سہولتیں میسر آئیں گی۔
اجلاس کے دوران گلگت بلتستان میں موٹروے پولیس کی تعیناتی اور مسافروںکو بہترین سہولتوں کی فراہمی پر بھی غور کیا گیا۔
وفاقی وزیر نے شاہراہوں کی تعمیر اور نئے منصوبوں کی نشاندہی کیلئے ترجیحات کا تعین کرنے کی ہدایت کی۔
انہوں نے این ایچ اے سے کہا کہ وہ دوسرے ملکوں میںمنصوبوں پر کام کرنے کا ایک ماڈل تیار کریں۔