وفاقی وزیر خزانہ و محصولات محمد اورنگزیب نے واشنگٹن ڈی سی میں آئی ایم ایف اور عالمی بینک کے 2025 کے موسم بہار کے اجلاس کے موقع پر منعقدہ آئی ایم ایف کے پینل مباحثے "ریونیو میں درمیانی مدت میں اضافہ" میں شرکت کی۔

اس مباحثے میں وزیر خزانہ نے حکومت کی جانب سے ٹیکس بیس کو وسیع کرنے کے لیے اُٹھائے گئے اقدامات پر روشنی ڈالی۔ انہوں نے زراعت، رئیل اسٹیٹ، ریٹیل اور ہول سیل جیسے اہم شعبوں کو قومی جی ڈی پی میں اُن کے حصے کے مطابق ٹیکس نیٹ میں لانے کی اہمیت پر زور دیا۔

محمد اورنگزیب نے فیڈرل بورڈ آف ریونیو (ایف بی آر) کو جدید خطوط پر استوار کرنے کے لیے انسانی وسائل، طریقہ کار اور ٹیکنالوجی کے استعمال پر بھی بات کی۔ انہوں نے ٹیکس دہندگان اور ٹیکس جمع کرنے والے کے درمیان براہ راست رابطے کو کم کرنے، نفاذ اور تعمیل کو مضبوط بنانے اور مصنوعی ذہانت کی مدد سے حسب ضرورت آڈٹس متعارف کرانے کی حکومتی کوششوں کو بھی اجاگر کیا۔

انہوں نے ٹیکس اکٹھا کرنے والے ادارے اور عوام کے درمیان اعتماد کی اہمیت پر زور دیتے ہوئے کہا کہ ٹیکس اصلاحات کی کامیابی کے لیے یہ اعتماد ناگزیر ہے۔