حضرت امام حسین رضی اللہ تعالیٰ عنہ اور کربلا میں اُن کے جانثار ساتھیوں کی عظیم قربانی پر انہیں خراج عقیدت پیش کرنے کیلئے کل دس محرم الحرام کو یوم عاشور ملک بھر میں انتہائی عقیدت و احترام کے ساتھ منایا جائے گا۔

اس موقع پر ملک کے تمام شہروں اور قصبوں میں ماتمی جلوس نکالے جائیں گے۔

علمائے کرام اور ذاکرین اپنے خطابات میں حضرت امام حسین رضی اللہ تعالیٰ عنہ کی روشن تعلیمات اور واقعہ کربلا کے مختلف پہلوؤں پر روشنی ڈالیں گے۔

آج 9 محرم الحرام کے موقع پر بھی ملک بھر میں شہدائے کربلا کو خراج عقیدت پیش کرنے کیلئے ماتمی جلوس نکالے جا رہے ہیں۔

شہدائے کربلا کی یاد تازہ کرنے کیلئے تعزیے اور ذوالجناح کے جلوس برآمد کیے جا رہے ہیں اور اسلام کیلئے ان کی بے مثال قربانیوں کو اجاگر کیا جا رہا ہے۔

محرم الحرام کے دوران کسی بھی ناخوشگوار واقعے سے بچنے کیلئے سکیورٹی کے جامع انتظامات کیے گئے ہیں۔