فائل فوٹو
صدر مملکت آصف علی زرداری اوروزیراعظم محمدشہبازشریف نے آج ملیریا کی روک تھام کے عالمی دن کے موقع پر اپنے الگ الگ پیغامات میں اس وباء سے بچاؤ کی اہمیت سے متعلق آگاہی پیدا کرنے پر زوردیا ہے۔
صدر آصف علی زرداری نے اپنے پیغام میں ملیریا کی روک تھام کیلئے اجتماعی کوششوں پر زوردیا انہوں نے کہاکہ اقدامات کا مقصد ملیریا کے ہرمشتبہ کیس کی تشخیص،تصدیق اوراس کا موثر علاج معالجہ ہے۔
آصف علی زرداری نے اس خطرناک صورتحال سے نمٹنے کیلئے صوبائی حکومتوں اور دوسرے شراکت داروں پر متحد ہونے پرزوردیا ۔
وزیراعظم محمد شہبازشریف نے اپنے پیغام میں ہردوسرے شخص کے تجربات سے سیکھنے اوراس وباء کی روک تھام کیلئے ہر دوسرے شخص کی کوششوں کی حمایت کرنے کی ضرورت پر زوردیا ۔
انہوں نے کہاکہ اس حوالے سے حکومت کا مقصد وباء کے خلاف جدوجہد میں مزید لوگوں کو شامل کرنا ہے جس کی وجہ سے ہرسال دس لاکھ سے زائد پاکستانی متاثر ہوتے ہیں۔
وزیراعظم نے کہاکہ حکومت نے ملک بھر میں ملیریا کی وبا والے اضلاع میں ملیریا کی مفت تشخیص اورعلاج معالجے کی سہولیات میں خاطر خواہ اضافہ کیاہے ۔
انہوں نے کہاکہ ہمیں ملیریا سے بچاؤ اوراس کی روک تھام کے اقدامات کی اہمیت سے متعلق صحت عامہ کے نظام کو مضبوط بنانے ، معیاری تشخیص اور علاج معالجے تک رسائی بڑھانے اور وبا سے متعلق آگاہی پیدا کرنے کیلئے ملکر کام کرناچاہیے ۔
