وزیراعظم شہباز شریف نے کہا ہے کہ اسلام آباد مفاہمتی یادداشت کے تحت امریکہ اور ایران کے درمیان تکنیکی سطح کے مذاکرات عالمی امن کیلئے ایک اہم اور بہترین موقع ہیں۔
انہوں نے یہ بات آج سوئٹزرلینڈ کے شہر برگن اسٹاک میں امریکہ ایران تکنیکی سطح کے مذاکرات سے قبل اظہار خیال کرتے ہوئے کہی۔
شہباز شریف نے اُمید ظاہر کی کہ سربراہ اجلاس کے مثبت اور ٹھوس نتائج برآمد ہوں گے اور دنیا بھر میں امن اور ترقی کو فروغ ملے گا۔
انہوں نے مذاکرات کے عمل کو جاری رکھنے میں امریکہ، ایران اور قطر کے کردار کا شکریہ ادا کیا۔
وزیراعظم نے بالخصوص فیلڈ مارشل سید عاصم منیر کے کردار اور پورے عمل میں ثابت قدمی کو سراہا۔
اس موقع پر امریکی نائب صدر جے ڈی وینس نے کہا کہ آج ہم ایک ایسا مستقبل دیکھ رہے ہیں جہاں ہم سب مل کر امن اور خوشحالی کو فروغ دینے کے لیے کام کر سکتے ہیں۔
انہوں نے کہا کہ صدر ٹرمپ نے امریکی وفد کو آبنائے ہرمز کے کھلنے سمیت متعدد مسائل کا حل تلاش کرنے کا اختیار دیا ہے۔
امریکی نائب صدر نے چیف آف آرمی سٹاف اور چیف آف ڈیفنس فورسز فیلڈ مارشل سید عاصم منیر کو زبردست خراج تحسین پیش کرتے ہوئے کہا کہ ان کی مدبرانہ صلاحیتوں کے بغیر ہم یہاں نہ ہوتے۔
انھوں نے کہا کہ میں نے گزشتہ تین ماہ کے دوران فیلڈ مارشل سے زیادہ کسی سے بات نہیں کی۔
