وفاقی وزیر خزانہ محمد اورنگزیب نے واشنگٹن میں عالمی بینک اور آئی ایم ایف سپرنگ اجلاس 2025 کے موقع پر ڈیلوئٹ ٹیم سے ملاقات کی ہے جس میں پاکستان کی اقتصادی صورتحال سمیت اہم امور پر تفصیلی تبادلہ خیال کیا گیا۔

وزیرِ خزانہ نے پاکستان کی مجموعی اقتصادی صورتحال، حکومت کے شعبہ جاتی ترقیاتی ایجنڈے اور برآمدات پر مبنی ترقیاتی ترجیحات پر روشنی ڈالی۔

ملاقات میں توانائی کے شعبے میں اصلاحات، قیمتی معدنیات کی تلاش، مارکیٹنگ، نجکاری، ٹیکنالوجی، کرپٹو پالیسی اور کنٹری پارٹنرشپ فریم ورک (CPF) کے نفاذ کے شعبوں میں تعاون کا جائزہ لیا گیا۔

 وزیر خزانہ نے مئی 2025 میں ڈیلوئٹ ٹیم کی پاکستان آمد کا خیر مقدم کیا، جس سے ان شعبوں میں تعاون کے لیے مزید تفصیلی بات چیت کی راہ ہموار ہوگی۔