پاکستان میں سعودی عرب کے سفیر نواف بن سید المالکی نے پاکستان کی معاونت کیلئے اپنے ملک کے عزم کا اعادہ کیا ہے۔
اسلام آباد میں سال دو ہزار چوبیس اور پچیس کیلئے ''فوڈسیکیورٹی اقدام'' کے اجراء کے موقع پر اظہار خیال کرتے ہوئے سفیرالمالکی نے چاروںصوبوں' گلگت بلتستان اور آزاد کشمیر کے ضرورت مند افراد کیلئے ایک لاکھ سینتالیس ہزار پانچ سو فوڈ پیکجز تقسیم کرنے کا اعلان کیا۔
انہوں نے کہا کہ شاہ سلمان انسانی امداد کے مرکز کے زیراہتمام یہ اقدام عالمی انسانی ہمدردی کی کوششوں کیلئے سعودی عرب کے عزم کو اجاگر کرتا ہے۔
سعودی سفیر نے کہا کہ شاہ سلمان امدادی مرکزبرادر ملک پاکستان اور اس کے عوام کی بھی شاندار خدمت کر رہا ہے اورمشکل میں ان کے ساتھ کھڑا ہے۔
انہوں نے کہا کہ غذائی تحفظ کے اقدام سے ہزاروںنادار خاندانوں کو فائدہ پہنچے گا جس سے سعودی عرب اور پاکستان کے درمیان تاریخی تعلقات مزید مستحکم ہوں گے۔
