مظفرآباد میں عالمی بین المذاہب امن کانفرنس میں آج مقررین نے اقوام متحدہ اور اسلامی تعاون تنظیم سے ایسے قوانین وضع کرنے کی اپیل کی ہے جن کے ذریعے تمام مقدس کتابوں اور مذہبی صحیفوں کے تحفظ کی ضمانت حاصل ہو۔

آزاد جموں و کشمیر کے صدر بیرسٹر سلطان محمود چوہدری نے اسلام کو امن کا مذہب قرار دیتے ہوئے کہا کہ دنیا کے سامنے اسلام کی حقیقی تصویر پیش کرنے کی اشد ضرورت ہے۔

انہوں نے کہا کہ اسلام تمام انسانیت کو ایک خاندان تصور کرتا ہے اور مساوات، انصاف اور امن پر یقین رکھتا ہے۔آزادجموں و کشمیر کے صدر نے سویڈن اور ڈنمارک میں قرآن پاک کی بے حرمتی کے واقعات کی مذمت کرتے ہوئے کہا کہ اس قسم کے مذموم واقعات عالمی امن کے لئے سنگین خطرہ ہے۔