انسانی حقوق کے پارلیمانی سیکرٹری لعل چند ملہی نے کہا ہے کہ حکومت ملک میں انسانی حقوق کے تحفظ کیلئے عملی اقدامات کررہی ہے اور گزشتہ تین سال کے دوران اس حوالے سے کئی قوانین تشکیل دیے گئے ہیں۔انہوں نے ریڈیو پاکستان کے خبروں اور حالات حاضرہ کے چینل کو ایک خصوصی انٹرویو میں کہا کہ حکومت اقلیتوں، خواتین اور بچوں سمیت پسماندہ طبقات کی بہتری پر خاص توجہ دے رہی ہے۔لعل چند ملہی نے کہا کہ صحافیوں اور میڈیا کارکنوں کے حقوق کے تحفظ کیلئے صحافیوں کے تحفظ کا قانون ایک بڑی کامیابی ہے۔ایک سوال کے جواب میں انہوں نے کہاکہ موجودہ حکومت نے غریب اور مستحق لوگوں کو قانونی معاونت فراہم کرنے کیلئے لیگل ایڈاینڈ جسٹس اتھارٹی قائم کی ہے۔انہوں نے کہا کہ شہری ہیلپ لائن 1099 کے ذریعے فوری مدد، رہنمائی اور قانونی معاونت تک رسائی حاصل کرسکتے ہیں جبکہ لاپتہ بچوں کے الرٹ سے متعلق زارا ایپ کا بھی آغاز کیا گیا ہے۔