پٹرولیم کے وزیر علی پرویز ملک نے پاکستان کی پانچ آئل ریفائنریز کی انتظامیہ سے ملاقاتیں کیں جن میں براؤن فیلڈ ریفائنری اپ گریڈیشن پالیسی پر عملدرآمد اور پاکستان کی توانائی کا تحفظ مضبوط بنانے کے اقدامات کا جائزہ لیا گیا۔

ریفائنریز کی انتظامیہ نے ریفائنری اپ گریڈیشن پالیسی کے تحت معاہدوں پر دستخط کرنے کے لیے آمادگی کا اعادہ کیا۔ یہ معاہدے آئندہ ماہ کے شروع میں متوقع ہیں۔

وفاقی وزیر نے کہا کہ ملک کے ریفائننگ شعبے کی طویل مدتی پائیداری کے لیے تیل صاف کرنے کے کارخانوں کو جدید خطوط پر استوار کرنا ضروری ہے۔

انہوں نے کہا کہ مجوزہ اپ گریڈیشن کے بعد یہ کارخانے پاکستان میں یورو فائیو معیار کے مطابق ایندھن تیار کر سکیں گے۔

وزیر پٹرولیم نے کہا کہ پاکستان کی ریفائننگ صلاحیت کو جدید بنانا پٹرولیم مصنوعات کے معیار اور کارکردگی کو بہتر بنانے کے لیے اہم ہے اور مقامی فراہمی کو مضبوط بنانے، درآمدی پٹرول اور ڈیزل پر انحصار کم کرنے اور ملک کے وسیع تر توانائی کے تحفظ کے مقاصد کو آگے بڑھانے کے لیے بھی ضروری ہے۔