وزیرخارجہ بلاول بھٹو زرداری نے مالی مجبوریوں کے باوجود عوام کو علاج معالجے کی بہتر سہولتیں فراہم کرنے پر سندھ حکومت کی تعریف کی ہے۔انہوں نے یہ بات آج کراچی میں بارہ سو بستروں پرمشتمل امراض قلب کے دنیا کے سب سے بڑے ہسپتال کا سنگ بنیاد رکھنے کی تقریب سے خطاب کرتے ہوئے کہی ۔انہوں نے کہاکہ پاکستان پیپلزپارٹی کی حکومت نے صوبے کے مختلف اضلاع میں اعلی معیار کے ہسپتال قائم کیے ہیں جن سے دوسرے صوبوں کے عوام بھی استفادہ کررہے ہیں۔انہوں نے کہاکہ تحریک انصاف کے سربراہ عمران خان نے خیبرپختونخوا میں اپنے نو سالہ دور حکومت میں کوئی ہسپتال قائم نہیں کیا ۔سندھ کے وزیراعلی سید مراد علی شاہ نے اس موقع پر اظہار خیال کرتے ہوئے کہاکہ یہ ہسپتال پچپن ایکڑ اراضی پرقائم کیاجائے گا اور اس میں سولہ بڑے اور چھوٹے آپریشن روم ہوںگے۔