پنجاب کےسینئر وزیرعبدالعلیم خان نے صوبے میں محکمہ جنگلات کی اراضی واگزار کرانے کے لئےبڑے پیمانے پر کارروائی شروع کرنے کی ہدایت کی ہے۔

 وہ آج لاہور میں محکمے کےایک اعلیٰ سطح کے اجلاس کی صدارت کررہے تھے جس میں وزیرجنگلات سبطین خان نے بھی شرکت کی۔

 اجلاس کے دوران سینئر وزیر کو بتایا گیا کہ صوبے میں محکمہ جنگلات کی سات ہزارایکڑ سے زائد اراضی پر غیرقانونی قبضہ ہے۔

 سینئر وزیر نے پاکستان تحریک انصاف کے 100 دن کےایجنڈے کے تحت زیادہ سے زیادہ پودے لگانے کی ہدایت کی۔ انہوں نے صوبے میں جنگلات کا رقبہ بڑھانے کےلئے موثر منصوبہ بندی کرنے کی بھی ہدایت کی کیونکہ جنگلات کی اراضی کا تین اعشاریہ ایک فیصد موجودہ تناسب انتہائی تشویشناک ہے۔

عبدالعلیم خان نے کہا کہ وزیراعظم عمران خان پاکستان کو ایک سرسبز و شاداب ملک کےطور پر دیکھنا چاہتے ہیں۔