صدر آصف علی زرداری اور وزیراعظم محمد شہباز شریف نے ضلع ڈیرہ اسماعیل خان میں دہشت گردوں کے خلاف کامیاب آپریشن پر سیکیورٹی فورسز کو خراج تحسین پیش کیا ہے۔

 اپنے الگ الگ پیغامات میں دونوں نے آپریشن میں 4 خوارج کو ہلاک کرنے پر سیکیورٹی فورسز کو سراہا۔

 انہوں نے آپریشن میں جام شہادت نوش کرنے والے سپاہی باسط صدیقی کو بھی خراج عقیدت پیش کیا اور کہا کہ قوم اپنے شہداء کی قربانیوں کو ہمیشہ یاد رکھے گی۔

 دونوں نے شہید کے درجات کی بلندی اور سوگوار خاندان سے دلی ہمدردی کا اظہار کیا۔

صدر مملکت نے کہا کہ دہشت گردی کے مکمل خاتمے تک سکیورٹی فورسز کی کارروائیاں جاری رہیں گی۔

 وزیراعظم نے ملک میں دہشت گردی کی تمام شکلوں اور مظاہر کو ختم کرنے کے عزم کا بھی اظہار کیا۔