کل جماعتی حریت کانفرنس کی قیادت نے حق خودارادیت کے حصول کی جدوجہد میں مقبوضہ جموںوکشمیر کے عوام سے غیر متزلزل اظہار یکجہتی کرنے پر پاکستان کی حکومت اور عوام کا تہہ دل سے شکریہ ادا کیا ہے۔
سینئر حریت رہنما شبیر احمد شاہ نے نئی دلی کی بدنام زمانہ تہاڑ جیل سے ایک پیغام میں کہا کہ ہرسال پانچ فرور ی کو یوم یکجہتی کشمیر منانا پاکستان کی مستقل پالیسی، غیر متزلزل عزم اور کشمیر کاز سے پختہ وفاداری کا واضح ثبوت ہے۔
کل جماعتی حریت کانفرنس کے ایک اور سینئر رہنما میر واعظ عمر فاروق نے سرینگر میں ایک بیان میں کہاہے کہ کشمیری عوام اپنی خواہشات کے مطابق اقوام متحدہ کے تسلیم شدہ دیرینہ تنازعہ کشمیر کے منصفانہ اور پرامن حل کے لیے جدوجہد جاری رکھیں گے۔
انہوں نے مسئلہ کشمیر کو کشمیری عوام کی امنگوں کے مطابق حل کرنے کے لیے بامعنی مذاکرات کی ضرورت پر زور دیا۔
ادھرسرینگر اور وادی کشمیر کے دیگر علاقوں میں ایک بار پھر پاکستان کے سبز ہلالی پرچم اور ''شکریہ پاکستان ''کے نعروں والے پوسٹر چسپاں کیے گئے ہیں۔
