وزیرخارجہ بلاول بھٹو زرداری نے کہا ہے کہ حکومت ملک کے سیلاب متاثرین کی بحالی اور امداد کیلئے تمام دستیاب وسائل بروئے کار لارہی ہے۔

آج کراچی میں نیوز کانفرنس سے خطاب کرتے ہوئے انہوں نے کہا کہ حکومت اور سول سوسائٹیاں سیلاب سے متاثرہ علاقوں میں امدادی کاموں میں مصروف ہیں۔ انہوں نے کہا کہ سندھ کے سیلاب متاثرہ علاقوں سے پچاس فیصد پانی کا اخراج کرلیا گیا ہے۔ بلاول بھٹو زرداری نے کہا کہ وزیراعظم شہباز شریف نے سیلاب متاثرین کا دکھ محسوس کیا اور مسلسل سیلاب متاثرین کی مدد میں مصروف ہیں۔ انہوں نے کہا کہ یہ سیاست کا نہیں بلکہ انسانیت کو ترجیح دینے کا وقت ہے۔ انہوں نے مخیر حضرات سے اپیل کی کہ وہ سیلاب متاثرین کی مدد کیلئے آگے آئیں۔