وزیراعظم شہبازشریف نے ملک میں تعلیمی ایمرجنسی کا اعلان کرتے ہوئے عزم ظاہر کیا ہے کہ سکول نہ جانے والے دو کروڑ ساٹھ لاکھ بچوں کو سکولوں میں داخل کرایاجائے گا ۔
آج(بدھ) سہ پہر اسلام آباد میں تعلیمی ایمرجنسی کے حوالے سے قومی کانفرنس سے خطاب کرتے ہوئے انہوں نے کہاکہ وفاقی حکومت صوبوں کے تعاون سے سکول نہ جانے والے بچوں کو سکول بھیجنے کیلئے پرعزم ہے ۔
وزیراعظم نے کہاکہ کوئی قوم تعلیم کے بغیر خوشحال نہیں ہوسکتی۔
شہبازشریف نے کہاکہ وہ اس پورے پروگرام کی خودنگرانی کریںگے۔
پنجاب کے وزیراعلیٰ کی حیثیت سے اپنے اقدامات کو اجاگر کرتے ہوئے وزیراعظم نے کہا کہ انہوں نے سکول میں بچوں کے داخلے میں نمایاں طور پر اضافہ کیا۔
انہوں نے کہا کہ جنوبی پنجاب میں بچیوں کو تعلیم سے آراستہ کرنے پر مراعات دیں۔
انہوں نے کہا کہ طالبات کو وظائف دینے کے ساتھ ساتھ ان کے والدین کو بھی معاوضہ دیا گیا تاکہ طالبات سکولوں میں تعلیم حاصل کرسکیں۔
وزیراعظم نے کہا انہوں نے بطور وزیراعلی پنجاب جبری مشقت کا کامیای سے خاتمہ کیا اور بھٹوں میں کام کرنے والے آٹھ سے پندرہ سال تک کے عمر کے نوے ہزار بچوں کو سکول میں داخل کرالیا۔
شہبازشریف نے مزید کہا کہ ان کے قائم کردہ دانش کول غریب طلبہ کو معیاری تعلیم کے ساتھ رہائش کی سہولت بھی فراہم کررہے ہیں۔