وفاقی وزراء عبدالحفیظ شیخ اسد عمر اور محمد میاں سومرو پر مشتمل پاکستان تحریک انصاف کے ایک وفد نے سندھ کے گورنر عمران اسماعیل سے آج کراچی میں ملاقات کی۔ملاقات کے دوران کراچی کو بہتر بنانے کے منصوبے کے تحت وفاقی حکومت کی طرف سے فراہم کئے گئے فنڈز سے جاری منصوبوں پر پیشرفت پر غور کیا گیا۔اس موقع پر منصوبہ بندی اور ترقی کے وزیر اسد عمر نے کہا کہ وفاق کراچی کی ترقی کیلئے اپنی ذمہ داریوں سے بڑھ کر کام کر رہا ہے۔وزیرخزانہ شیخ عبدالحفیظ نے کہا کہ کراچی کی ترقی کے حوالے سے وزیراعظم کی خصوصی ہدایات ہیں اور تمام منصوبے مقررہ وقت پر مکمل کئے جائیں گے۔وفاقی وزیر محمد میاں سومرو نے کہاکہ وزیراعظم صوبہ سندھ کی ترقی کے حوالے سے وزیراعظم عمران خان کا وژن ایک اچھا قدم ہے۔اس سے قبل وفد نے متحدہ قومی موومنٹ پاکستان اور گرینڈ ڈیموکریٹک الائنس کے سربراہ سے بھی آج کراچی میں ملاقات کی۔ملاقاتوں کے دوران سینیٹ کے آئندہ انتخابات اور باہمی دلچسپی کے امور زیر غور آئے۔