پاکستان میں برطانیہ کی ہائی کمشنر جین میریٹ نے کوئٹہ میں وزیراعلیٰ بلوچستان میر سرفراز بگٹی سے ملاقات کی۔

ملاقات کے دوران دونوں رہنماؤں نے بلوچستان کی پائیدار ترقی کے لیے تعلیم، صحت، بہتر طرزِ حکمرانی اور سرمایہ کاری کے شعبوں میں تعاون کے مواقع کا جائزہ لیا۔

اس موقع پر وزیراعلیٰ بلوچستان میر سرفراز بگٹی نے کہا کہ امن، پائیدار ترقی اور عوامی فلاح و بہبود صوبائی حکومت کی اولین ترجیحات ہیں۔

انہوں نے کہا کہ بین الاقوامی شراکت داروں کے تعاون سے ترقی کو فروغ دینے، سرمایہ کاری بڑھانے اور بلوچستان میں خوشحالی لانے کے نئے مواقع پیدا ہو رہے ہیں۔

وزیراعلیٰ نے اس عزم کا اعادہ کیا کہ صوبائی حکومت اجتماعی ترقی اور بین الاقوامی شراکت داری کو مزید مضبوط بنانے کے لیے پرعزم ہے۔