بھارت کے غیر قانونی زیر قبضہ جموں و کشمیر میں بھارتی فوج نے اپنی ریاستی دہشت گردی کی تازہ کارروائی میں ضلع شوپیاں میں ایک جعلی مقابلے میں تین کشمیری نوجوانوں کو شہید کردیا۔

بھارتی فوجیوں نے ان نوجوانوں کو ضلع کے علاقےKeller Shukroo میں محاصرے اور تلاشی کی کارروائی کے دوران شہید کیا۔

تاہم مقامی لوگوں نے صحافیوں سے باتیں کرتے ہوئے پولیس افسر کے دعوؤں کی تردید کی اور کہا کہ ضلع میں فوجیوں نے نوجوانوں کو گھروں سے زبردستی اٹھایا اور ایک جعلی مقابلے میں شہید کر دیا۔

اُدھربھارتی فورسز نے سرینگر میں پرتشدد چھاپہ مارکارروائیوں کا سلسلہ جاری رکھا اورغیرقانونی سرگرمیوں کی روک تھام کے کالے قانون کے تحت گھروں میں گھس کر بینک دستاویزات، موبائل فون، لیپ ٹاپ اور قیمتی اشیا اپنے قبضے میں لیں۔

بھارتی فورسزنے چھاپوں کے دوران مکینوںکو ہراساں کیا ،املاک کو نقصان پہنچایا اور زیورات اور نقدی لوٹنے کی اطلاعات بھی ہیں۔

دوسری طرف کل جماعتی حریت کانفرنس نے امریکہ کی ثالثی میں پاکستان اور بھارت کے درمیان مذاکرات کی بحالی کا خیرمقدم کرتے ہوئے کہا ہے کہ جنوبی ایشیا میں پائیدار امن کا انحصار کشمیری عوام کی امنگوں کے مطابق تنازعہ کشمیر کے حل پر ہے۔

حریت کانفرنس کے ترجمان ایڈوکیٹ عبدالرشید منہاس نے سرینگر میں جاری ایک بیان میں واشنگٹن کی ثالثی کی کوششوں کو سراہتے ہوئے کہا کہ حقیقی کشمیری قیادت کو مذاکرات میں شامل کیا جانا چاہیے۔

جیل میں نظربند حریت رہنما بلال صدیقی نے آپریشن بنیان مرصوص میں پاکستان کی فتح کو سراہتے ہوئے تنازعہ کشمیر کو مذاکرات کے ذریعے حل کرنے پر زور دیا۔

ایک اور پیش رفت میں جموں و کشمیر ڈیموکریٹک فریڈم پارٹی کے قائم مقام چیئرمین محمود احمد ساغر نے امریکی صدر ڈونلڈ ٹرمپ کے نام ایک خط میں پاکستان اور بھارت کے درمیان کشیدگی کو کم کرنے کے لئے ان کے اہم کردار کا اعتراف کیا ہے۔