فرانس اور مصر نے مسلسل اسرائیلی حملوں اور جنگ بندی کی خلاف ورزیوں کی مذمت کی ہے۔

قاہرہ میں ایک مشترکہ نیوز کانفرنس کے دوران فرانس کے صدر ایمانوئیل میکرون نے اپنے مصری ہم منصب عبدالفتح السیسی کے ہمراہ جنگ بندی اور غزہ میں فوری امداد کی فراہمی پر زوردیا۔

فرانسیسی صدر نے کہا کہ وہ غزہ اورمغربی کنارے سمیت اپنے وطن سے کسی کو بھی جبری بے دخل کرنے کے خلاف ہیں۔

انہوں نے کہا کہ اس طرح کے اقدامات عالمی قانون اور آئین کی کھلی خلاف ورزی اور پورے خطے کی سلامتی کیلئے براہ راست خطرہ ہیں۔

انہوں نے کہا کہ فرانس غزہ کی تعمیر نو کیلئے گزشتہ ماہ کی چار تاریخ کو عرب ممالک کی طرف سے پیش کردہ منصوبے کی حمایت کرتا ہے ۔

مصر کے صدر نے کہا دونوں ممالک اس بات پر متفق ہیں کہ فلسطینیوں کو اپنے وطن سے جبری بے دخل کرنا ناقابل قبول ہے ۔

انہوں نے کہا کہ مسئلہ فلسطین حل کیئے بغیر خطے میں امن ناممکن ہے ۔