صدر ڈاکٹر عارف علوی نے اعلان کیا ہے کہ قوم کورونا وباء سے بچائو کیلئے کل یوم دعا منائے گی۔جمعرات کے روز اسلام آباد میں علماء سے ملاقات کے بعد انہوں نے کہاکہ اجتماعی دعائوں ، احتیاطی تدابیر اختیار کرنے اور معاشرے کے کمزور طبقات پر کورونا وباء کی دوسری لہر کے دوران نظر رکھنے کی پالیسی مرتب کی گئی ہے ۔صدر نے عوام سے مطالبہ کیا کہ وباء پھیلنے سے روکنے کیلئے متعین طریقہ کار پرسختی سے عمل کیاجائے۔انہوں نے کہا احتیاطی تدابیر کے حوالے سے آگاہی فراہم کرنے کیلئے علماء کا ایک اہم کردارہے۔ انہوں نے کہاکہ علماء اس حوالے سے اپنا موثر کردار ادا کرنے پر متفق ہوگئے ہیں۔صدر نے کہاکہ علماء نے بھی مشاہدہ کیا ہے کہ سیاستدانوں کو بھی کورونا وباء کے خلاف متحد ہونااور اپنے عوامی اجتماعات کو موخر کردیناچاہیے ۔انہوں نے میڈیا سے بھی درخواست کی کہ وہ عوام میں کورونا وباء سے متعلق ایس او پیز کی معلومات پھیلانے میں اپنا کردار بڑھائے۔