وزیراعظم کے مشیر رانا ثناء اللہ نے نوجوانوں کو صحت مند تفریحی مواقع فراہم کرنے کے لیے  کھیلوں کے مقابلوں کے انعقاد کے حوالے سے حکومتی عزم کا اظہار کیا ہے۔

وہ پاکستان سپورٹس کمپلیکس اسلام آباد میں شروع ہونے والے قائداعظم بین الصوبائی گیمز کی افتتاحی تقریب سے خطاب کررہے تھے۔

انہوں نے کہا کہ بین الصوبائی کھیلوں کے مقابلے ہر دو سال بعد منعقد کئے جانے چاہیئے۔

رانا ثناء اللہ خان نے اعلان کیا کہ قائداعظم بین الصوبائی گیمز میں اچھی کارکردگی کا مظاہرہ کرنے والے کھلاڑیوں کو ہائی پرفارمنس سپورٹس اکیڈمی میں داخلہ دیا جائے گا جو وزیراعظم شہباز شریف کے ویژن کے تحت تکمیل کے قریب ہے، کھلاڑی اکیڈمی میں بین الاقوامی معیار کی تربیت حاصل کریں گے۔

انہوں نے بتایا کہ 2 ارب 7 کروڑ روپے کی لاگت سے قائم ہونے والی اکیڈمی میں ایک جدید ترین بائیو مکینکس لیب شامل ہوگی جو کھلاڑیوں کی کارکردگی اور فٹنس کو بہتر بنانے کے لیے بنائی گئی ہے۔کھیلوں کے فروغ کے لیے حکومت کے اہم اقدامات کا خاکہ پیش کرتے ہوئے رانا ثناء اللہ خان نے کہا کہ محکمانہ کھیلوں کو بحال کیا جائے گا،تمام محکموں اور خود مختار اداروں کو ہدایت کی جائے گی کہ وہ اپنی ٹیمیں تشکیل دیں اور کھلاڑیوں کے لیے خصوصی کوٹہ اور وظائف مختص کریں۔