وزیر صحت مصطفی کمال نے یقین دہانی کرائی ہے کہ کم آمدنی والے مریضوں کو بہترین سہولیات مہیا کرنے کے لئے صحت کے شعبے کو بہتر بنانے کے لئے کوششیں کی جارہی ہیں۔

آج(جمعرات) پمز کے دورے کے موقع پر ذرائع ابلاغ کے نمائندوں سے گفتگو کرتے ہوئے انہوں نے موجودہ ہسپتالوں پر بوجھ کم کرنے کے لئے ٹیلی میڈیسن سمیت مختلف جدید تکنیکی سہولیات کا استعمال متعارف کروانے کی اہمیت کو اجاگر کیا۔

مصطفی کمال نے کہا کہ حکومت ایک مریض ایک شناخت نظام رائج کرنے پر کام کررہی ہے جو صرف ایک ہسپتال تک محدود نہیں ہوگی بلکہ ملک بھر کے ہسپتالوں میں میسر ہوگی۔

وزیر صحت نے کہا کہ وزیراعظم جلد پمز میں اس منصوبے کا افتتاح کریں گے ۔انہوں نے کہا کہ پمز میں سات جدید آپریشن تھیٹر بنائے گئے ہیں۔