پاکستان اور چین نے زراعت، سرمایہ کاری، ٹیکنالوجی کی منتقلی، تحقیق اور تعلیم کے شعبوں میں دوطرفہ تعاون میں اضافے پر اتفاق کیا ہے۔
یہ اتفاق رائے وزیر خارجہ شاہ محمود قریشی اور ان کے چینی ہم منصب وانگ ژی کے درمیان ٹیلیفون پر گفتگو میں ہوا۔شاہ محمود قریشی نے چینی وزیرخارجہ کو نئے سال کیلئے نیک خواہشات کا پیغام دیتے ہوئے تیزی سے بدلتے ہوئے عالمی منظرنامے کے تناظر میں نئے چیلنجز سے نمٹنے کیلئے پاکستان اور چین کے درمیان دوطرفہ تعاون اور روابط میں اضافے کی ضرورت پر زور دیا۔انہوں نے کہا کہ یہ امر انتہائی باعث اطمینان ہے کہ دونوں ملکوں کی قیادت چین پاکستان اقتصادی راہداری کے دوسرے مرحلے کے منصوبوں کو مکمل کرنے کیلئے پرعزم ہے۔شاہ محمود قریشی نے کہا کہ بھارت میں مودی کی حکومت کی ہندوتوا پالیسیوں سے ایشیائی خطے کے امن و استحکام کو شدید خطرات لاحق ہیں۔انہوں نے عالمی برادری سے بھارت کے غیرقانونی زیرقبضہ جموں و کشمیر میں بھارتی قابض فوج کی جانب سے کشمیریوں کے استحصال اور انسانی حقوق کی جاری سنگین خلاف ورزیوں کو روکنے کیلئے فوری کارروائی کی ضرورت پر زور دیا۔دونوں وزرائے خارجہ نے افغانستان اور افغان قیادت کے مابین بات چیت میں امن کوششوں پر خصوصی تبادلہ خیال کیا۔انہوں نے خطے میں امن و استحکام کے لئے ایک مشترکہ حکمت عملی اختیار کرنے اور مشترکہ کوششیں جاری رکھنے کے عزم کا اعادہ کیا۔
