شنگھائی تعاون تنظیم کے رکن ملکوں نے عدالتی تعاون مزید مضبوط بنانے پر اتفاق کیا ہے۔

یہ بات بیجنگ میں شنگھائی تعاون تنظیم کے رکن ملکوں کی سپریم کورٹس کے سربراہان کی 13ویں کانفرنس کے بعد جاری مشترکہ بیان میں کہی گئی۔

رکن ملکوں کے نمائندئوں نے سرحد پار جرائم کے خلاف تعاون اور بین الاقوامی سول اور تجارتی تنازعات کو حل کرنے پر زور دیا۔

چیف جسٹس میاں ثاقب نثار نے کانفرنس سے اپنے خطاب میں شنگھائی تعاون تنظیم کے رکن ملکو ں کے درمیان وسیع ترتعاون کی ضرورت پر زوردیا تاکہ خطے میں دہشت گردی اور انتہاپسندی جیسے مسائل سے نمٹاجاسکے۔

انہوں نے کہاکہ پاکستان میں تمام سول عدالتوں کو ہدایت کی گئی ہے کہ چین پاکستان اقتصادی راہداری سے متعلقہ منصوبوں میں کوئی بھی حکم امتناعی جاری نہ کیاجائے اور اس فیصلے سے پاکستان کے عدالتی نظام پر بیرونی سرمایہ کاروں کے اعتماد میں اضافہ ہوگا اور انہیں پاکستان میں سرمایہ کاری کرتے ہوئے تحفظ اور سہولت کا احساس ہوگا۔