سیکرٹری خارجہ سہیل محمود نے اسلامی تعاون تنظیم سیکرٹریٹ جدہ میں تنظیم کے سیکرٹری جنرل حسین براہیم طحہ سے ملاقات کی اور امت کے نصب العین میں ایک ثابت قدم ساتھی کے طورپر پاکستان کے کردار کو اجاگر کیا ۔

ایک ٹویٹ میں دفترخارجہ نے کہا کہ ملاقات میں پاکستان اور اسلامی تعاون تنظیم کے درمیان تعاون مقبوضہ کشمیر ، افغانستان کی صورتحال اسلام مخالف پرپیگنڈے اور پاکستان میں اسلامی تعاون تنظیم کے رکن ممالک کی وزرائے خارجہ کونسل کے اڑتالیسویں اجلاس کے امور پر توجہ مرکوز کی گئی ۔ملاقات کے دوران اسلامی تعاون تنظیم کے سیکرٹری جنرل نے تنظیم کے رکن ممالک کے وزرائے خارجہ کونسل کی میزبانی پرپاکستان کو مبارک باد دی اوراس کی کامیابی کیلئے دعا کی ۔فریقین نے وزرائے خارجہ کونسل کے اڑتالیسویں اجلاس کی میزبانی کیلئے جاری پاکستان کی تیاریوں کاجائزہ لیا ۔دونوں فریقوں نے اسلامی تعاون تنظیم کے ایجنڈے پراہم امور اور تنظیم کے کردارکو مزید موثر بنانے پر بھی تبادلہ خیال کیا ۔