فائل فوٹو
سائنس اور ٹیکنالوجی کے بارے میں وزیراعظم کی ٹاسک فورس کے چیئرمین ڈاکٹر عطاالرحمن نے کہا ہے کہ اچھی شہرت کی حامل ایک بین الاقوامی کمپنی کی تیار کی گئی کورونا وائرس کی روک تھام کی ویکسین کے تجربات اس ہفتے سے پاکستان میں شروع کئے جائیں گے۔
اے پی پی سے باتیں کرتے ہوئے انہوں نے کہا کہ جامعہ کراچی میں قائم کیمیائی اور حیاتیاتی سائنس کے بین الاقوامی مرکز نے ویکسین کے طبی تجربات کرنے کی منظوری دی ہے۔
ڈاکٹر عطا الرحمن نے کہا کہ پہلے مرحلے میں طبی تجربات تقریبا تین ماہ میں مکمل ہوں گےاور طبی تجربات کا دوسرا مرحلہ پہلے ہی چین میں مکمل کرلیاگیا ہے جبکہ تجربات کا تیسرا مرحلہ پہلے مرحلے کی تکمیل کے بعد شروع ہوگا۔
انہوں نے کہا کہ تمام تجربات کی کامیاب تکمیل کے بعد کوروناوائرس کی روک تھام کی ویکسین اگلے سال اپریل اور جون کے مہینوں کے دوران ملک میں دستیاب ہوگی۔