نیشنل کمانڈ اینڈ آپریشن سینٹر نے بھارت میں کورونا وائرس کی نئی بدترین قسم کے پھیلائو کے تناظر میں بھارت کو دو ہفتے کے لئے کیٹگری سی ممالک کی فہرست میں ڈالنے کافیصلہ کیا ہے۔یہ فیصلہ پیر کے روز اسلام آباد میں نیشنل کمانڈ اینڈ آپریشن سینٹر کے اجلاس میں کیا گیا جس کی صدارت منصوبہ بندی کے وزیر اسد عمر نے کی۔اس کیٹگری میں دو ہفتے کے لئے بھارت سے فضائی اور زمینی راستے سے آنے والے مسافروں پر پابندی عائد ہوگی۔اجلاس کو کورونا وائرس کی نئی بدترین قسم کے پھیلائو کے حوالے سے بتایا گیا جسے بھارت میں موجودہ بیماری کو مزید پھیلانے کا ذمہ دار تصور کیا جارہا ہے۔دیگر ممالک میں بھارتی وائرس کی موجودگی کے پیش نظر کیٹگری سی ممالک کا جائزہ رواں ماہ کی21تاریخ کو لیا جائے گا۔