اقتصادی رابطہ کمیٹی نے توانائی ڈویژن کی طرف سےخصوصی ریلیف پیکیج کی تجویز کی منظوری دی ہے جس کا مقصد پانچ برآمدی شعبوں کو اس سال جون تک بجلی کے نرخوں پر اعانت کی فراہمی جاری رکھناہے ۔
یہ منظوری آج اسلام آباد میں مشیر خزانہ حفیظ شیخ کی زیر صدارت کمیٹی کے اجلاس میں دی گئی۔
اجلاس میں پٹرولیم کے شعبے کی ترقی کےلئے کاروبار کو آسان بنانے سے متعلق وزارت توانائی کی دو ترامیم کی تجویز بھی منظور کی گئیں۔
یہ ترامیم ذخائر کی تلاش کے لائسنسوں کو دوسال سے زائد عرصے تک توسیع دینے اور ساحلی پٹی پر لائسنسوں کے نظام کےلئے نئے زون ون ایف کے قیام اور اس کے نتیجے میں علاقائی نقشے پر نظر ثانی سے متعلق ہیں۔
اجلاس میں گندم کی امدادی قیمت 1400 روپے فی من بڑھانے کی تجویز کا جائزہ لیاگیا۔ آٹے کی قیمت پورے سال ممکنہ حد تک کم سطح پررکھنے کے حوالے سے تفصیلی لائحہ عمل پر غور کےلئے کمیٹی کا خصوصی اجلاس کل طلب کیاگیا ہے۔