آزاد کشمیر کے صدر مسعود خان نے کہا ہے کہ مقبوضہ کشمیر میں انسانی حقوق کی صورتحال انتہائی تشویشناک ہے اور وادی انسانیت کے لئے درد ناک نوحہ بن چکی ہے۔ انہوں نے ان خیالات کااظہار اتوار کے روزانسانی حقوق کے عالمی دن کے سلسلے میں اسلام آباد میں ایک سیمینار سے خطاب کرتے ہوئے کیا۔ انہوں نے کہا کہ انسانی حقوق کا عالمی دن یہ ظاہر کرتا ہے کہ ہم ہر سطح پر بنیادی انسانی حقوق کے فروغ کے لئے کام کریں مسعود خان نے کہاکہ عالمی سطح پر مسلمہ انسانی حقوق پر کسی انتخاب اور جانبداری کے بغیر عملدرآمد کیا جانا چاہیے۔مسعود خان نے کہا کہ انسانی حقوق کے عالمی اعلامیے میں درج تمام اصولوں کی بنیاد صدیوں پہلے اسلام نے فراہم کی تھی۔انہوں نے مقبوضہ کشمیر میں بھارتی فورسز کے مظالم پر آواز نہ اٹھانے پر اقوام متحدہ کے کردار پر افسوس کا اظہار کیا۔