وزیراطلاعات و نشریات عطا اللہ تارڑ نے کہا ہے کہ پاکستان نے روایتی جنگ میں واضح برتری کا مظاہرہ کرتے ہوئے بھارت کے پانچ طیاروں اور 77 ڈرونز کو کامیابی سے گرا کر بھارتی جارحیت کا بھرپور جواب دیا ہے۔

انہوں نے آج ایک بیان میں کہا کہ پاکستان ایک پرامن ملک ہے، تاہم کسی بھی جارحیت کے خلاف اپنا دفاع کرنا ہمارا قانونی، اخلاقی اور ریاستی حق ہے۔

انہوں نے کہا کہ پاکستان نے اپنا یہ حق ذمہ داری کے ساتھ استعمال کیا ہے اور کرتا رہے گا۔

وزیر اطلاعات نے کہاکہ حالیہ دنوں میں بھارت نے عسکری محاذ پر اشتعال انگیزی کی اور اپنے عوام کو گمراہ کرنے کیلئے داخلی سطح پر میڈیا پر بدترین پروپیگنڈا مہم شروع کی۔

انہوں نے کہا کہ بھارتی میڈیا پر منظم انداز میں فیک نیوز، پرانی تصاویر اور جعلی ویڈیوز کے ذریعے ایک جھوٹا بیانیہ گھڑا جا رہا ہے۔

انہوں نے کہا کہ پاکستان نے بھارت کا جھوٹا پروپیگنڈا بھرپور طریقے سے بے نقاب کیا جس سے بھارت کو مزید ہزیمت اٹھانا پڑی۔

عطا اللہ تارڑ نے اس امر کا اعادہ کیا کہ جھوٹے بیانیے کے ذریعے بھارت کی ناکامی چھپانے کی ناکام کوشش پوری دنیا نے دیکھی ہے جس کی وجہ سے اسے شرمندگی کا سامنا کرنا پڑا ہے۔