نیویارک میں اقوام متحدہ کی جنرل اسمبلی کے ستترویں اجلاس کے موقع پر عالمی بینک گروپ کے صدرڈیوڈآرمل پاس کے ساتھ ملاقات میں وزیراعظم شہبازشریف نے پاکستان کے ساتھ عالمی بینک کی شراکت داری کوسراہا۔وزیراعظم نے انہیں معیشت کی مضبوطی ،قیمتوں، بیرونی اورمالیاتی شعبوں کے استحکام کے بارے میں معاشی پالیسیاں متعارف کرانے کے لئے حکومتی اقدامات سے آگاہ کیا۔انہوں نے کہاکہ حکومت موسمیاتی تبدیلیوں کے پاکستانی معیشت اور عوام پر تباہ کن اثرات سے نمٹنے کے لئے عالمی برادری سے اضافی سرمایہ کاری اور مالیاتی وسائل کی ضروریات کے حصول کے لئے کوشاں ہے۔انہوں نے سیلاب زدگان کے لئے سینتیس کروڑ بیس لاکھ ڈالر کی امداد فراہم کرنے پر عالمی بینک کاشکریہ اداکیا۔اس موقع پر عالمی بینک کے صدرنے وزیراعظم کو بتایا کہ عالمی بینک سیلاب زدگان کی امدادی سرگرمیوں کے لئے پاکستان کو فوری طورپرپچاسی کروڑ ڈالرکی امداد فراہم کرنے کے لئے پُرعزم ہے۔عالمی بینک کے صدرنے کہاکہ پاکستان کوعالمی برادری کے مشترکہ تعاون سے ترجیحی بنیاد پر تعمیرنوپرتوجہ دینی چاہیے۔