وزیراعظم عمران خان نے نوجوانوں میں اسلامی تاریخ کے بارے میں آگاہی پیدا کرنے کیلئے جدید ٹیکنالوجی اپنانے پر زور دیا ہے۔ وہ فلم ساز شہزاد نواز، ترک پروڈیوسر Emre Konuk ،سید جنید علی شاہ اور ڈاکٹر کاشف سے باتیں کررہے تھے جنہوں نے اسلام آباد میں ان سے ملاقات کی۔ وزیراعظم نے کہا کہ تاریخی کہانیوں پر ڈرامے اور فلمیں بنانے کی ضرورت ہے۔انہوں نے کہا کہ صلاح الدین ایوبی ایک تاریخی کردار ہیں جن کا مغرب کی جانب سے بھی حوالہ دیا جاتا ہے انہوں نے کہا کہ صلاح الدین ایوبی نے بیت المقدس تاریخی فتح کے بعد عام معافی کا اعلان کیا تھا۔ انہوں نے کہا کہ صلاح الدین ایوبی کی زندگی پر بنائی جانیوالی سیریز سے نوجوانوں کو اس تاریخی کردار کے بارے میں آگہی ملے گی۔ملاقات کے دوران وزیراعظم کو صلاح الدین ایوبی سیریز کے بارے میں پاکستان اور ترکی کے مشترکہ منصوبے سے متعلق بریفنگ دی گئی، انہیں بتایا گیا کہ سیریز کیلئے منصوبہ بندی مکمل کرلی گئی ہے جبکہ اس کی عکس بندی کا عمل اگلے سال اپریل میں شروع ہوگا۔