لاہور کے ایکسپو سنٹر میں پاکستان کی سب سے بڑی سہ روزہ ٹیکنالوجی کانفرنس اورنمائش فیوچر فیسٹ2023 آج تیسرے روز بھی ایکسپو سینٹر لاہور میں جاری ہے۔مختلف کاروباری شخصیات، فیصلہ سازپالیسی ساز، سرمایہ کاراورنئے آئیڈیاز متعارف کرانے والے بھی اس کانفرنس میں شریک ہیں جو انفارمیشن ٹیکنالوجی کے مختلف پہلوئوں اور محفوظ مستقبل میں اس کے کردار کو اجاگر کررہے ہیں۔فیوچرفیسٹ2023 میں سعودی عرب کے نیا کاروبارشروع کرنے والوں اور سرمایہ کار کی شمولیت بھی تاریخی اہمیت کی حامل ہے جو پاکستانی کمپنیوں اور اہم شراکت داروں سے ملاقاتوں میں سرمایہ کاری، شراکت داری، اشیاء کے حصول اور باصلاحیت نوجوانوں کی تلاش کے مواقع میں گہری دلچسپی لے رہے ہیں۔ریڈیو پاکستان نے بھی اس کانفرنس میں پہلی مرتبہ اپنا سٹال لگایا ہے جس کا مقصد ادارے میں حالیہ تکنیکی جدت، تربیتی کورسز، اہم اقدامات اور شرکاء کے لئے مواقع کو اجاگر کرنا ہے۔