بھارت کے غیر قانونی زیر قبضہ جموں و کشمیر کے مختلف علاقوں میں بھارتی فورسز کی جانب سے محاصرے اور تلاشی کی کارروائیاں جاری ہیں، جس سے پورے مقبوضہ علاقے میں سخت اقدامات میں مزید شدت آگئی ہے۔

کشمیر میڈیا سروس کے مطابق، 6 سیکٹر راشٹریہ رائفلز کے تحت کام کرنے والے 156 ٹیریٹوریل آرمی اور 37 راشٹریہ رائفلز کے اہلکاروں نے ضلع پونچھ کی تحصیل مینڈھر کے علاقے سلانی میں واقع گاؤں کسبلاڑی اور منڈی کے قریب محاصرے اور تلاشی کی کارروائی شروع کی۔

ادھر بھارتی فورسز نے ضلع راجوری میں کلاکوٹ کے علاقوں کاکورہ اور مہاری کے علاوہ ضلع سوپور اور ہندواڑہ میں بھی محاصرے اور تلاشی کی کارروائیاں جاری رکھیں۔

محاصرے اور تلاشی کی مسلسل کارروائیوں، گھروں پر چھاپوں، تلاشی کے عمل اور پابندیوں نے مقامی رہائشیوں میں اپنی حفاظت، نجی زندگی کے تحفظ اور نقل و حرکت کی آزادی کے حوالے سے خدشات میں اضافہ کر دیا ہے۔

بھارتی فورسز کی بھاری نفری کی تعیناتی اور ان مسلسل کارروائیوں کا مقصد مقبوضہ علاقے پر اپنے کنٹرول کو مزید مضبوط بنانا اور حریت پسند جذبات کو دبانا بھی ہے۔