وزیراعظم شہباز شریف نے کہا ہے کہ حکومت مزید ٹیکس لگانے کے بجائے آمدن میں اضافے کیلئے ٹیکس کا دائرہ بڑھانے پر توجہ دے گی۔انہوں نے یہ بات بدھ کے روز اسلام آباد میں اعلیٰ سطح کے اجلاس کی صدارت کرتے ہوئے کہی جس میں معاشی اقدامات پر غور کیا گیا۔وزیراعظم نے متعلقہ حکام کو ہدایت کی کہ معاشی استحکام اور ملکی ترقی کیلئے اقدامات کے حوالے سے عالمی ماہرین اور ملکی متعلقہ اداروں سے مشاورت کی جائے۔انہوں نے کہا کہ برآمدی صنعت کے لئے عالمی منڈی تک رسائی فراہم کرنا یقینی بنایا جائے گا انہوں نے کہا ملک میں چھوٹے، درمیانے اور بڑے درجے کی صنعتیں قائم کی جائیں گی۔وزیراعظم نے کہا کہ حکومت نوجوانوں کو جدید معیارات سے ہم آہنگ علم اورہنر سے لیس کرے گی۔